ബ്രഹ്മപുരത്തെ മാലിന്യ സംസ്കരണ കേന്ദ്രത്തില് തീപിടിത്തമുണ്ടായതിനെ തുടര്ന്ന് കൊച്ചി ആകെ വിഷപ്പുകയില് മുങ്ങിയിരുക്കുകയാണ്.ഇപ്പോഴിതാ ബ്രഹ്മപുരത്തെയും പരിസരപ്രദേശങ്ങളിലെയും ജനങ്ങള്ക്ക് വൈദ്യസഹായവുമായി നടൻ മമ്മൂട്ടി. രാജഗിരി ആശുപത്രിയില് നിന്നുള്ള മെഡിക്കല് സംഘം ചൊവ്വാഴ്ച മുതല് ഇവിടെ സൗജന്യ പരിശോധനയ്ക്കെത്തും. മമ്മൂട്ടിയുടെ നേതൃത്വത്തിൽ ‘കെയര് ആൻഡ് ഷെയര്’പുക ഏറ്റവും കൂടുതല് വ്യാപിച്ച പ്രദേശങ്ങളിലാണ് മരുന്നുകളും ഓക്സിജന് കോണ്സെന്ട്രേറ്ററുകളും ഉള്പ്പെടെയുള്ളവയുമായി സഞ്ചരിക്കുന്ന മെഡിക്കല് യൂണിറ്റ് പര്യടനം നടത്തുക.
ഡോ. ബിജു രാഘവന്റെ നേതൃത്വത്തിലാണ് സഞ്ചരിക്കുന്ന മെഡിക്കല് യൂണിറ്റുകളുടെ പ്രവര്ത്തനം. വിഷപ്പുക മൂലം വലയുന്ന ആസ്മ രോഗികള്ക്കടക്കം ഓക്സിജന് കോണ്സന്ട്രേറ്ററുകള് വലിയൊരളവില് സഹായകരമാകുമെന്ന് രാജഗിരി ആശുപത്രി എക്സിക്യൂട്ടീവ് ഡയറക്ടര് ഫാ. ജോണ്സണ് വാഴപ്പിളളി പറഞ്ഞു.ചൊവ്വാഴ്ച വടവുകോട് പുത്തന്കുരിശ് പഞ്ചായത്തിലെ ഒന്നാംവാര്ഡായ ബ്രഹ്മപുരത്താണ് വൈദ്യസംഘത്തിന്റെ പരിശോധന. ബുധനാഴ്ച കുന്നത്ത്നാട് പഞ്ചായത്തിലെ പിണര്മുണ്ടയിലും വ്യാഴാഴ്ച തൃപ്പൂണിത്തുറ മുനിസിപ്പാലിറ്റിയിലെ വടക്കേഇരുമ്പനം പ്രദേശത്തും പരിശോധനയുണ്ടാകും.
വിദഗ്ദ്ധപരിശോധനയ്ക്കുള്ള സജ്ജീകരണങ്ങളൊരുക്കിയ വാഹനം വീടുകള്ക്കരികിലെത്തും. ഇതില് ഡോക്ടറും നഴ്സുമുണ്ടാകും. മരുന്നുകളും ആവശ്യമുള്ളവര്ക്ക് ഓക്സിജന് കോണ്സന്ട്രേറ്ററുകളും സൗജന്യമായി നല്കും. പുകയില് നിന്ന് സംരക്ഷണം നല്കുന്ന ഉന്നതനിലവാരത്തിലുള്ള മാസ്ക്കുകള് ബ്രഹ്മപുരത്ത് വിതരണം ചെയ്യുന്നതിനായി കെയര് ആന്ഡ് ഷെയര് വൈദ്യസംഘത്തിന് കൈമാറിയിട്ടുണ്ട്.